៧០លានដុល្លារថតរឿងហូលីវូដនៅកម្ពុជា
September 26, 2010 Leave a comment
Source: Sabay
អត្ថបទ៖ សុខ ឧត្ដម
កែសម្រួល៖ ចេង វណ្ណា
សន្និសីទដ៏ធំ រវាងក្រុមផលិតករភាពយន្តហូលីវូដ គឺលោកតូនី(Tony Schiena) និងមន្ត្រីជាន់ខ្ពស់កម្ពុជា មកពីក្រសួងព័ត៌មានកាលពីម្សិលមិញ បានឈានដល់ការសម្រេចអោយថតរឿង «មហាអធិរាជខ្មែរ» ដែលលើកឡើងពីប្រវត្តិពិតរបស់មហាក្សត្រខ្មែរដ៏ល្បីល្បាញគឺព្រះបាទជ័យវរ្ម័ន ទី៧ ជាផ្លូវការហើយ ដោយគ្រោងចំណាយថវិកាដល់៧០លានដុល្លារ និងថតទាំងស្រុងនៅលើទឹកដីនៃព្រះរាជាណាចក្រកម្ពុជាផ្ទាល់តែ ម្ដង។
ឯកឧត្ដម ម៉ៅ អាយុទ្ធ រដ្ឋលេខាធិការក្រសួងព័ត៌មាន បានអោយ”សប្បាយ”ដឹងថា ក្រោយការសិក្សាលម្អិតពីប្រវត្តិដ៏អស្ចារ្យរបស់ព្រះមហាក្សត្រ ខ្មែរ គឺព្រះបាទជ័យវរ្ម័នទី៧ ក្រុមផលិតករហូលីវូដ និងផលិតករនៃប្រទេសហូឡង់ បានដាក់សំណើរសុំថតប្រវត្តិមហាក្សត្រខ្មែរមួយអង្គ នេះ នៅលើទឹកដីកម្ពុជា។ ឯក ឧត្ដម ថ្លែងថា «តាមការពិភាក្សា ខាងហូលីវូដ នឹងចំណាយប្រាក់ចំនួន៧០លានដុល្លារ ហើយថតរឿងនេះនៅលើទឹកដីអង្គរយើងទាំងស្រុង នាអំឡុងខែមករាឆ្នាំក្រោយ ហើយសន្យាថានឹងប្រើរយៈពេលបីឆ្នាំថតអោយចប់ស្រេចមហាភាពយន្តនេះ »។ មន្ត្រីជាន់ខ្ពស់រូបនេះ បន្តថា ជាជោគវាសនាធំធេងណាស់ ដែលផលិតករហូលីវូដដ៏ល្បីល្បាញរបស់ពិភពលោក បានសម្រេចចងក្រងប្រវត្តិរបស់ព្រះមហាក្សត្រខ្មែរ ដើម្បីថតជាខ្សែ ភាពយន្ត ខណៈដែលរឿងនេះ ទោះ១០ ឬ២០ឆ្នាំទៀត ក៏កម្ពុជាគ្មានលទ្ធភាពថតអោយល្អឥតខ្ចោះដូចផលិតកម្មនេះ ដែរ។ ឯកឧត្ដមនិយាយថា «កម្ពុជាប្រគល់រឿងនេះ អោយហូលីវូដថត មិនមែនមានន័យថាកម្ពុជាគ្មានអ្នកផលិតនោះទេ ប៉ុន្តែរឿងប្រវត្តិសាស្ត្របែបនេះ ដាច់ខាតមិនអាចថតលេងសើច ដោយប្រើដើមទុនតិចតួច ហើយធ្វើអោយខូចភាពអស្ចារ្យក្នុងជំនាន់ព្រះអង្គឡើយ»។
សន្និសីទ ដែលប្រកាសអោយដឹងពីគម្រោង ថតរឿងព្រះបាទជ័យវរ្ម័នទី៧ នៅលើទឹកដីខ្មែរ នាដើមឆ្នាំក្រោយ ខាងមុខនោះ មិនបានបញ្ជាក់ថា តារាខ្មែរណាម្នាក់ នឹងបានដើរតួសំខាន់ក្នុងខ្សែរឿងឡើយ ខណៈដែលតំណាងផលិតករហូលីវូដ អះអាងជាសាធារណៈប្រាប់ដល់អង្គសន្និសីទថា តួអង្គព្រះបាទជ័យវរ្ម័នទី៧ គឺសម្ដែងដោយ តារាល្បីល្បាញ ចន ស៊ីណា ដែលមានមាឌធំខ្ពស់ និងតួឯកស្រី គឺសម្ដែងដោយ តារាស្រីកូរ៉េ នាង ហាន់ ជីអ៊ុន ព្រមទាំងតារាហូលីវូដ អែនជឹលីណា ជូលី និង លី លានជា (Jet Li) ទៀតផង។
លោក តូនី ជាផលិតករ និងជាតារាសម្ដែងល្បីល្បាញ ក្នុងក្រុមហ៊ុនហូលីវូដ និយាយថា «តាមរយៈការសិក្សា ពីលក្ខណៈសម្បត្តិ និងរូបរាង របស់ព្រះបាទ ជ័យវរ្ម័នទី៧និង តួអង្គពាក់ព័ន្ធ ខ្ញុំយល់ថា មិនសក្ដិសមនឹង តារាខ្មែរណាម្នាក់ឡើយ ប៉ុន្តែយើងក៏បានផ្ដល់ឱកាសអោយពលរដ្ឋខ្មែរ បានដើរតួរាយរង ពិសេសក្នុងតួជាកងទ័ពដែលត្រូវប្រើដល់អាចរាប់ពាន់នាក់ក្នុង ពេលថតផងដែរ»។ លោកអះអាងថា ក្រុមហ៊ុនហូលីវូដ នឹងដំណើរការថតរឿងនេះ នៅលើទឹកដីអង្គរ ដោយនឹងប្រឹងសម្រាំងអោយត្រឹមត្រូវតាមប្រវត្តិសាស្ត្រដែលបានចូល រួមសិក្សាដោយអ្នកប្រវត្តិវិទូខ្មែរ មុនពេលឈានដល់ការប្រកាសក្នុងសន្និសីទនេះ អោយបាន១០០% ។
លោក ទេព រិនដារ៉ូ និង លោក យុត្ថារ៉ា ឆានី ព្រមនឹងភិរយា ថ្លែងក្នុងអារម្មណ៍រំភើបថា បើទោះជាខ្លួនមិនត្រូវបានជ្រើសអោយដើរតួ ក្នុងរឿងប្រវត្តិសាស្ត្រខ្មែរដ៏សំខាន់ដំបូងនេះក៏ដោយ ក៏ពួកបង្ហាញទស្សនៈស្របគ្នាប្រកបដោយការ សប្បាយចិត្ត។ តារាជើងចាស់ទាំងពីរ បានថ្លែងក្នុងឱកាសសន្និសីទកាលពីម្សិលមិញថា «ពួកយើងមិនគិតថា មិនគប្បីដែលខាងផលិតករហូលីវូដ មិនជ្រើសតារាខ្មែរ អោយដើរតួសំខាន់នោះទេ ព្រោះពួកគាត់ដឹងថា តួយ៉ាងម៉េចទើបស៊ីនឹងប្រវត្តិនាអតីតកាលនោះ ដូច្នេះយើងមានតែសប្បាយ ពេលក្រុមផលិតភាពយន្តដ៏ល្បីល្បាញ លើពិភពលោកនេះ សម្រេចថតរឿងរបស់ខ្មែរនៅលើទឹកដីខ្មែរ ដើម្បីបង្ហាញពីសក្ដានុពលខ្មែរ អោយសកលលោកបានឃើញនាពេលអនាគត »។ មិនទាន់មានការអះអាងថា រឿងនេះ នឹងអាចត្រូវបញ្ចាំង ក្នុងទីផ្សារស្រុកខ្មែរ ឬយ៉ាងណានៅឡើយទេ ប៉ុន្តែខ្សែរឿងនេះ នឹងទទួលជោគជ័យខ្លាំង ក្រោយពេលថតចប់ ខណៈដែលតួសម្ដែងសុទ្ធតែជាតារាល្បីលើលោក និងមានការចំណាយដល់៧០លានដុល្លារ ក្នុងដំណើរថតរឿង ដែលជាចំនួនច្រើនលើសលប់មិនធ្លាប់មាន ក្នុងចំណោមខ្សែភាពយន្តខ្មែរ ដែលធ្លាប់តាក់តែងឡើង តាំងពីអតីតកាលនោះ។
Recent Comments